عصير المشمش والموز

موضوع: عصير المشمش والموز 2010-01-30, 00:45

العصير
عصير المشمش والموز
عصير المشمش والموز Kamar_067

المقادير :-

• 3 ثمرات موز مقطعة قطعاً صغيرة
• معلقة كبيرة زبيب
• كوب عصير مشمش معلب
• 1/4 كوب مشمش مجفف
• 1/4 كوب عصير ليمون
• كوب كبير مية باردة
• مكعبات ثلج "اختياري"

الطريقة :-

اضربي كل المقادير دي مع بعضها في الخلاط وقبل أذان المغرب بربع ساعة صبيها في كاسات العصير وضيفي إليها مكعبات الثلج.

طبق الشوربة
شوربة المكرونة بالفراخ
عصير المشمش والموز Kamar_066

المقادير :-

• 1/4 كيلو صدور فراخ مغسولة كويس ومقطعة قطعاً صغيرة
• بصلة مقطعة قطعاً صغيرة
• جزرة مقطعة
• 1/2 كوب فاصوليا خضراء مسلوقة
• فص ثوم مدقوق
• 1/2 باكو مكرونة مسلوقة نص سلقة "أي نوع أنت بتحبيه"
• كوب ونصف مية
• 3 معالق زبدة
• ملح وفلفل
• أوراق بقدونس "للتزيين"

الطريقة :-

1. سيّحي الزبدة على النار، وبعد كده ضيفي إليها البصلة وقلبيهم مع بعض لغاية ما البصلة يبقي لونها ذهبي.

2. بعد ما البصلة لونها يبقى ذهبي ضيفي ليها قطع الفراخ واستمري في التقليب لغاية ما الفراخ لونها يبقى ذهبي.

3. بعد ما الفراخ لونها يبقى ذهبي ضيفي إليها الثوم المدقوق والجزر والفاصوليا والمكرونة والملح والفلفل مع التقليب لمدة خمس دقائق، وبعد كده ضيفي إليها المية، وسيبيهم على النار لمدة ربع ساعة، وبعد مرور الربع ساعة اطفي البوتجاز وصبيهم في أطباق الشوربة وزيني الأطباق بأوراق البقدونس..

طبق السلاطة
الكرنب والجزر
عصير المشمش والموز Kamar_068

المقادير :-

• قلب كرنبة مسلوق ومقطع إلى قطع صغيرة
• 1 جزرة كبيرة ومبشورة
• 1 بصلة صغيرة مبشورة
• 2 معلقة كبيرة عصير ليمون
• 1 معلقة صغيرة خل
• معلقة صغيرة سكر
• ملح وفلفل أسود
• 1/2 كوب زيت ذرة

الطريقة :-

1. اخلطي (نص كوباية زيت ذرة + 2 معلقة كبيرة عصير ليمون + 1 معلقة صغيرة خل + معلقة صغيرة سكر + ملح وفلفل أسود) مع بعض.

2. اخلطي الكرنب مع البصل مع الجزر وضيفي إليهم الخليط السابق وقلبيهم مع بعض كويس وحطيهم في طبق السلاطة.

الطبق الرئيسي
فراخ على الطريقة التركية
عصير المشمش والموز Kamar_071

أكيد كلكم تابعتم المسلسل التركي "نور" ونفسكم تتعرفوا على شوية أكلات تركية جديدة علشان كده جبنا لكم الطبق التركي ده النهارده، وعلى فكرة الطبق ده طريقته بسيطة جداً...

المقادير :-

• فرخة كبيرة مقطعة قطعاً متوسطة ومخلي منها العظم والجلد
• بصلتين مقطعين شرائح
• 1 ثمرة فلفل أصفر
• 1 ثمرة فلفل أحمر
• كوب كبير عصير طماطم
• معلقة كبيرة فلفل أسود
• معلقة كبيرة كمون
• معلقة كبيرة ملح
• فصين ثوم مدقوقين
• 1/4 كوب زيت
• 1/4 كوب زبدة

الطريقة :-

1. اغسلي الفراخ كويس، وشيلي منها الجلد واخلي منها العظم وقطعيها إلى قطع متوسطة الحجم.

2. هاتي حلة وحطي فيها الزبدة والزيت وحطيهم على النار، وبعد كده ضيفي إليهم الفراخ، وسيبيهم على النار لمدة نص ساعة مع التقليب المستمر، بعد كده شيلي الفراخ من الحلة وحطيها في حلة تانية.

3. في نفس الحلة اللي كان فيها الفراخ حطي البصل والفلفل والثوم، وقلّبيهم مع بعض لمدة عشرة دقائق.

4. بعد مرور العشر دقائق ضيفي إليهم الكمون والفلفل وعصير الطماطم والملح، وسيبيهم على النار لمدة عشرة دقائق، كمان علشان الطماطم تتسبك بعد كده ضيفي إليهم الفراخ وسبيهم مع بعض لمدة نص ساعة علشان الفراخ تتشرب من الطماطم، لو حسيتي إنها هتلزق ضيفي ليها شوية مية سخنة.

5. بعد ما تلاقي إن الفراخ استوت وشربت كل الطماطم اطفي البوتاجاز واغرفيها في أطباق التقديم ممكن مع الطبق ده إنك تعملي طبق مكرونة بيضاء.

الحلو
البقـــلاوة
عصير المشمش والموز Kamar_070

المقادير :-

• لفة جلاش
• سمنة
• تشكيلة متنوعة من المكسرات؛ الفستق والجوز واللوز
• شربات

الطريقة :-

1. هاتي صينية الفرن وادهنيها بالسمن كويس، وبعد كده رصي فيها ست أوراق من الجلاش، وخدي بالك إنك تمسحي وش كل ورقة هتحطيها بالسمنة كويس ما عدا آخر واحدة.

2. هاتي المكسرات وابشريها إلى قطع صغيرة واخلطيها مع شوية سكر وقرفة وماء الورد، وبعد كده رشي الخليط ده على الطبقة الأخيرة من الجلاش.

3. رصي ست أوراق أخرى من الجلاش مع مسح كل ورقة بالسمن وامسحي وشّ الورقة الأخيرة هي كمان.

4. قسمي أوراق الجلاش وهي في الصينية على شكل مربعات.

5. دخلي الصينية الفرن على درجة حرارة هادية وسيبيها لغاية ما وشها يحمر.

6. خرجيها من الفرن ورشي على وشها شوية فستق مبشور واسقيها بالشربات البارد.

ودي كمان طريقة عمل شربات البقلاوة...

مقادير الشربات:

• 1/2 كوب سكر
• 3/4 كوب مية
• عصير ليمونة
• فانيليا

طريقة عمل الشربات:

حطي السكر والمية مع بعض في إناء على نار هادئة لمدة ربع ساعة. بعد كده ضيفي الليمون وسيبيه لمدة 5 دقائق لغاية ما يغلي، وبعدها حطي الفانيليا وشيلي الخليط من على النار وسيبيه لغاية ما يبرد.

موضوع: رد: عصير المشمش والموز 2010-01-30, 01:43

والله يا ميس ما في مثلك مواضيعك على الوجع ههههههههههههههه
يسلمو يديكي

موضوع: رد: عصير المشمش والموز 2010-01-30, 22:35

شكرا لكي على الوصفه

موضوع: رد: عصير المشمش والموز 2010-01-31, 17:52

مشكور على الوصة الجميلة

موضوع: رد: عصير المشمش والموز 2010-02-01, 17:56

» المشمش
» ***لكل داء عصير ***
» عصير الليمون الصيفي