الزواج التقليدي

منذ فترة احاول كتابة موضوع عن الزواج التقليدي بطريقة دبلوماسية لا تمس و لا تثير اصحاب
التفكير الرجعي، و لليوم لم اجد اي طريق سهل للوصول بافكاري، فامتنعت عن الكتابة لحين قرائتي موضوع لصديقة، و قد وصلت لمرحلة الانفجار من الموضوع، فسأكتب و امري على الله
في مجتمعنا الذي نفخر به و نحاول ايصال رسالة للعالم اننا نحترم حقوق المرأة، و في بلد وصلت به المرأة لأعلى المناصب السيادية و السياسية، لا زال هناك عادة، و التي برأيي هي من اسوأ العادات، الزواج التقليدي، التي تعيدنا للخلف مئات السنين
ما ان تصل الفتاة في مجتمعنا الى عمر العشرين، يبدأ العرسان بالتهافت عليها، و كأنها سلعة جديدة بالسوق، او حبة مانجا ليشتريها خضراء، و يتلذذ باكلها بعد اكتمال نضجها


تبدأ الاتصالات العائلية، و حياتك بالغالي عريسك عندي، شب متكتك و مقرش و حليوة، و مش ناقصه شي، شخصية و احترام و كرم و ابن عيله و و و ، طب بما انه هالشاب بكل هذه الصفات الي حولته لرسول، و حليوه و شخصيه قويه، ليش صار عمره 35 سنة و ما عرف يحب بنت، و لا يتعرف على بنت؟؟ طبعاً القرد بعيون امه غزال، و الشخصية على خواته بسبب دلال امه، و متعود يوصله كل شيء لعنده، و بده امه تلاقيله بنت عالم وناس و محترمه و ذمتها مع بنات الناس، و الان بده بنت تخدمه و تعيشه عنتر زمانه، و تكون على زوق امه عشان تتطمن انها تعيشه بنعيم
الفتاة سلعة في مجتمعنا، فلا يهم رأيها بالشاب، بدي اقلبها عامّي زهقت فصحة… بالاول بسمع عن بنت بتشتغل في بنك، فبروح للبنك ليشوفها، اذا عجبته بروح لامه، يما شفت بنت حلوه في بنك و هي عنوانها.. اه يمه حلوه ؟ طويلة ؟ شقرا ؟ عيونها وساع ؟؟ والله يما قمر روحي شوفيها، ارفع السماعة، الو مرحبا، حابه ازورك في البيت ايمتا بتكون العروس بالبيت، انشاءالله بنزوركم، و العروس لهاللحظة مش عارفه شو عم يصير، بترجع عالبيت، بتحكيلها امها جايينا ناس زيارة الليلة، و الفاجعة الاكبر تأتي الام لوحدها او مع اخت العريس لتفحص البنت اذا بتناسب ابنها، و اذا لأ عشان تطلع و يا دار ما دخلك شر.. و فعلاً لو طلعت بتكون يا دار ما دخلك شر، لكن الشر كل الشر اذا عجبتها البنت، و بعدها البنت رفضت العريس لأنه اكبر منها بعشر سنوات، كيف ابني روميو ينرفض من بنت، و بتبدأ بالكلام على العيلة و على بناتها.. و طبعاً من بعدها بتعرف البنت انه الشب شافها في الشغل، و بتكره الشغل و يوم الشغل من تحت راس هالشب، و بتطلب من الادارة يحولوها للمكاتب الداخلية، و هذا المثال قصة واقعية صارت من فترة مع قريبة لي
السؤال هنا، شو الفرق بين المثل اعلاه و شراء سيارة ؟؟ بسمع من صاحبي انه في سيارة حلوه للبيع، بروح بشوفها، اذا عجبتني ببتعثها للفحص، و اذا الفحص كويس و عجبني ببدأ افاوض عليها، اما اذا البياع رفض يبيعني بزعل و بتفاجأ من تصرفه
و الادهى من كل الطرق اعلاه، هو نظام الخطّابه و الكاتالوج، اللي بتروح على الاعراس تتصيد ببنات الناس، و بتجمع صورهم و معلومات عنهم، و بتبدأ تعرضهم على الشباب، و نقي و استحلي يا حبيبي، كل هالبنات تحت امرك، نقي و استحلي و ادفعلي و اترك الباقي علي، قد يستغرب البعض و لكنها فعلاً موجودة و بكثرة في مجتمعنا
يا عالم، يا اهل، كيف بترموا بناتكم لشخص ما بتعرفوا ماضيه، و ما في حد عارف ماضيه، فمافي شي بيعيب الشاب بمجتمعنا، و ممكن انه يكون عامل العجب بحياته و جاي يتمسكن و يسوق الاحترام، بتسلموا بين ايديه بنتكم، و يا شباب كيف بتخطبوا بنت ما بتعرفوها، ممكن تكون عامله العجب بحياتها، و زي ما الشب بعيون اهله احسن شب و ابن عيله بغض النظر عن ماضيه، البنت بعيون اهلها الشريفة العفيفة لأنهم ما بعرفوا شيء عن حياتها و ماضيها
شو الحل، الحل انه مثل ما بيحاولوا في مجتمعنا انهم يحاربوا ثقافة العيب في العمل، يحاربوا ثقافة العيب في الاستقبال، و مثل ما بحاربوا ضاهرة اطلاق العيارات النارية بالافراح، يحاربوا ضاهرة الزواج التقليدي اللي عم بتدمر كل معاني التقدم في مجتمعنا
ممكن انها تكون اكبر فضفضة الي على الاطلاق، و ممكن اني اكون بعمم على مواقف و قناعات ذاتية، و فعلاً اني ما بقصد اي شخص بأذى، و بعرف انه تعميمي غير جائز خصوصاً انه عدد كبير من معارفي بيقتنعوا بالزواج التقليدي، لكن هذا رأيي، و هيك تفكيري، مع احترامي للجميع

السلامـــــ..، عليكمـــ.,.، ورحمة الله وبركاته
بسم الله الرحمن الرحيمـ،،،
كل الشكر والتقدير على الموضوع المميز والمهم

وبارك الله فيك / ي على الموضوع المميز والمفيد

وفي انتظار ما هو جديد من ابداعاتك معنا لرقي المنتدى
والى الامام دائما

وجزاك / ي الله خيرا على المجهود الكبير
جعله الله في ميزان حسناتك

thank you